Talaga Air Mata ?

   Urang alai tinggal barumah tangga di pinggir sungai Batang Alai. Urang Barabai kalu bajalan papadaan bibinian ketuju jalan baimbai. Kalu urang Alai duduk bahunju di palataran. Duduknya bajuntai, rambutnya nang labat nang kaya barumbai, ditiup angin rambutnya taurai, bagus kalihatannya.

   Kalu musim buah,babuahannya puhun-puhun rambai. Diputik dibawa balanjung, dijual ka pasar Barabai. Kada jauh pada rumah kadiaman Kiai Kota Barabai ada wadah pasinggahan. Hari panas, hari hujan urang banyak basinggah disitu. Panaduhan itu ngarannya gardu.

   Damintu ujar asal mula kisah jaman lagi panjajahan. Lamun urang-urang barabai, urang Batang Alai handak tulak naik haji, satumat singgah di garud. Mintu jua kalu ada pagawai nang cagar pindah nang maantarakan satumat basinggah di gardu. Gardu itu jadi wadah pasinggahan urang banyak.

   Kalu anak-anak palajar sakolah nang ramaja cagar inya tapisah kawannya, singgah dahulu di gardu. Mahadang garubak lalu, mahadang motor singgah mambawa panumpang. Nang cagar tapisah basalam-salaman. Nang lagi asyik bakasih-kasihan lalu inya bariristaan. Rindu dandamnya mandalam badan. Kasih sayangnya marajuk hati. Kasih sayang sudah marikit ngalih mambuang.
Nang lalakian baucap : aku kada lawan, kaina bulik. kaina kita badapat pulang, basabarai mahadang.  
Nang babinian manyahut : Jangan tapi lawas ka-ai. Aku mahadangi kita batamuan pulang.
Nang lalakian, nang babinian, tuha anum, langkar, bungas nang kaya itu baucap
Nang tuha baucap : Malam tadi manggangan tungkul. Siang ini manggangan sarai. Rasa hanyarnya kikicapan mahirup gangan tungkul. Rasa pilu hati. Malam tadi kita bakumpul. Siang ini kita bacarai. Nang apa alasannya lamun sudah marikit cinta kasih sayang. Aduhai, titik jua rasanya banyu mata. Titik jua rasanya air mata. Biar bapisah satumat, umai, rasahi satahun. Kaina badapat.
   Rasa cinta kasih sudah marasap dalam dada. Banyu mata bacucuran. Nang maninggalakan babanyu mata. Nang ditinggalakan bacucuran air mata. Ujar urang nang tuha-tuha di Batu Pagat, nang kisah bahari gunung Batu Banawa. Nang bujang nang parawan limbah tapisah bahamburan banyu mata. Manyasal hidup kada tuntung pandang. Cinta putus di tangah jalan. Kasih uma, kasih bapa kada disambut wan hati nang baik.

   Kisah urang Alai, urang Barabai, kisah tapisah di tangah jalan. Kisah wadah panyinggahan pahadangan malapasakan karinduan. 
Lawas kalawasan tanah gardu itu jadi sasambatan. 
Tatinggal sisa cinta. 
Tatinggal ngaran nang disayangi. 
Uma kasih anak.
Anak sayang uma.
Wadah panyinggahan itu lalu jadi sasambatan.
Simpang jalan, jalan titik air mata.
Disitu ada ngaran jalan. Ditulis ngaran jalan: TALAGA AIR MATA.
Bacalah, di Barabai ada jalan TALAGA AIR MATA.

{ 0 komentar... Skip ke Kotak Komentar }

Tambahkan Komentar Anda

tolong jangan porno,rasis,meninggalkan link aktif dan no telp mantan!

 
oh andrian © 2014 - 2018 | All Right Reserved